2011年7月31日 星期日

神戶北之坂 @ 太古城 Apita Foodcourt

下午响太古城行街街, 於是夜晚就响太古城開餐啦 ~

見平時食開嗰個 foodcourt 人頭湧湧, 於是就行去 Apita 嗰面個 foodcourt look look 先 ~

一 look 就有新發現喇 ~

睇吓呢間神戶北之坂先 ~ 好似幾吸引喎, 再望望坐响度食緊野既人, 大多數都係 order 呢間喎 !! 應該唔差得去邊, 就揀呢間啦 !!

隊長揀咗呢個茄汁雞扒奄列飯 set ($42) ~

set 包括 : 沙律, 湯, 主菜及飲品 ~




賣相唔錯喎, 仲幾好味 tim 呀 !!




啲前菜及湯都好 OK 呀 !!! 個湯好夠 creamy, 又唔似豆粉獻, 同埋夠晒熱, 正 ~




二等兵揀咗呢個三文魚菠菜意粉 set ($46) ~




二等兵好鍾意呢啲蔬菜沙律 !!! 好 fresh, 啲麻醬好好味 !!




個意粉好得 !!




晚餐兩個人先係 $88, 抵到爛 !!




估唔到 foodcourt 都有呢個質素, 呢個價錢配上呢個 quality 真係好 OK 呀 !!

2011年7月28日 星期四

金牌小籠 @ 銅鑼灣

近排團購團上癮, 早輪响 yahoo 團咗呢間金牌小籠 !!

好抵呀, 每位 $49 (已包加一及茶芥) !! 每人可以响佢指定既 list 入面揀三款野食 !!

就係呢個團購喇 : http://hk.deals.yahoo.com/hong-kong/offer/1240

$49 金牌小龍套餐:小籠包 3 隻 + 雜錦豆乾絲 / 四喜烤夫 / 涼拌蒿筍絲 + 擔擔撈麵 / 炸醬拌麵 / 菜粒蛋炒飯 共3道菜 品嚐天王級小籠包的滋味!(原價$100)




傳聞話佢係以前既鼎泰豐, 不過之後鼎泰豐收返佢既經營權, 所以佢先改名做金牌小籠 ~




前菜我哋叫咗雜錦豆乾絲 ~




同埋 四喜烤夫 ~




主菜就揀咗擔擔撈麵 ~




隊長呢個飯筒梗要喫飯啦, 呢個係菜粒蛋炒飯 ~




每人 3 隻小籠包 ~




都好多汁呀, 同埋新鮮蒸起熱辣辣, 正 ~




KO-ed 無難度 !!




每人一份 $49 既團購餐好似唔多夠喉, 於是我哋睇睇 menu 有咩啱食 ~

叫咗呢個油豆腐粉絲湯 ($32) ~




另外加多 6 隻菜肉生煎包 ($39 / 6隻) ~




埋單 $49 x 2 + $32 + $39 + $7.1 (10% charge) = $176.1 

今次隊長蠢咗, 明知唔夠食都唔買 3 個團購 ~ 但 $49 有 3 樣野食真係好抵呀 !!! 呢個價錢有呢個水準真係 OK 呀 !!

2011年7月23日 星期六

取帖, 買鞋及添置家居佈置 ~

响大暑既日子, 我哋响條街度行, 行, 行, 就快中暑喇 …

吃過午餐就上咗阿公屋企探阿婆, 佢仲記得我叫寶怡, 哈哈, 我相信咁耐唔見一次既人, 連我媽都未必記得個名, 反而阿婆記得我個名吖 !! 不過上到去又係咁焗呀, 唉, 斟茶嗰日都唔知點算好, 咁大夥人上到去, 又唔俾開冷氣, 又臭, 真係唔知點算 … 我諗我當日一入門, 肯定熱到個妝都溶, 仲要著住套咁厚身既裙掛, 一定會成身濕晒, 水為財呀 …

上完阿公度後, 就過海去彩印大皇取帖喇, 其實佢都好快手呀, 由上去揀款、覆稿、取件都只係兩個星期, 如果唔係覆稿嗰度我遲遲都未覆佢, 我諗佢 7 - 10 日都可以搞掂喇 !! 真係快 ~

攞咗帖又完成多一樣野喇, 夜晚俾媽媽睇, 佢哋都幾滿意呀, 不過佢哋無提出點解唔落佢阿爸個名, 佢哋唔提我梗係唔會特登講起啦 !! 只不過大家都話原來林和煦係呢個煦, 連我阿嫂都問呢個字係咩意思, 其實我只係知道有個形容詞係 “和煦的陽光”,中文唔好既我反而知道有呢個詞語囉 ..

攞完帖, 我哋就順住條路先去信和買貼紙, 買啲鬆鬆貼紙幫間屋粉飾吓先 ~~ 又上咗 Peter 仔度買咗個鬆鬆淋浴露樽, 雞仔咕0臣同埋一啲貼紙 ~ 呵呵 ~

then 再去埋有利買鞋, 不過今日唔好彩呀, 佢有一大棚親戚上咗黎, 唉, 佢掛住招呼嗰班親戚, 完全無理過我囉, 真無奈 …….. 明明大家都有俾錢, 但我就無呢個服務 ~ 最頂引係, 上次睇中咗嗰對 3” 高踭鞋, 寫住 $95, 然後我覺得太高, 佢介绍咗對 2.5” 俾我, 我見個款係一模一樣 ga, 今日俾錢先知原來對係 $150, 我就問個印傭, 唔係 $95 咩 ?? 佢話一對 3”, 一對 2.5”, 我話 : “吓, 少半吋貴咁多 ?!”, 佢就答我 : “2.5” $150 係 made in Hong Kong, 而平對係 made in china 囉 ~”

不過講返轉頭, 對婚紗鞋我著上腳真係幾穩陣, 平時著過吋半啲我都行到碌吓碌吓咁, 但呢對個踭明顯穩陣啲 !! 同埋我揀呢個款平時都著得返, $150 都唔算貴既 ~

攪掂晒啲野後, 就坐返 102 返 home lu, 今日真係大出血呀 …

2011年7月18日 星期一

秋田日式鐵板燒 @ 尖沙咀

是日二等兵壽晨, 今年我哋平淡啲, 就咁食飯慶祝 ~

隊長特別安排了鐵板燒, 佢早兩日差遣佢秘書 book 位 !! 聰明既你哋知唔知呢位秘書係邊個呢 ?? 
一放工就趕黎尖沙咀天文台道, 行到身水身汗, 好彩冷氣夠強勁啫 !! 不過連續落咗成個禮拜雨, 好彩今晚天公造美吖 !!

一張鐵板枱大約坐 4 - 6 , 全餐飯都無人坐响我哋旁邊, 所以成晚都係獨享呢位師傅 !!




左邊係點牛肉, 中間是點海鮮用的茄汁, 最右手邊係豉油 ~




一坐低已經見到碗沙律喇, 通常食日式鐵板燒都有呢類沙律做前菜 ~




仲有枝豆同漬物 ~




二人套餐有三款, 價錢分別係每位 $4xx, $528 & $568, 我哋分別叫咗 $528 同 $568 既鐵板 set , 因為只有 $528 同 $568 套餐可以一齊叫 share  ~

等我講吓有咩分別先 ~

每位 $528/$568 二人套餐包括 :

- 沙律 / 沙律

- 活伊勢龍蝦 / 活伊勢龍蝦

- 香煎鵝肝 / 香煎鵝肝

- 銀鱈魚柳 / 原隻鮮活鮑魚

- 澳洲頂級和牛薄燒 / 澳洲頂級和牛薄燒

- 招牌秋田炒飯 / 招牌秋田炒飯

- 炒野菜 / 炒野菜

- 龍蝦清湯 / 龍蝦清湯

- 甜品 / 甜品

其實兩個餐最大分別係一份食銀鱈魚, 一份就食鮑魚 ~

好喇, 開始喇, 首先整海鮮 !!

隻龍蝦好生猛呀, 仲識郁架, 雖然就咁望住佢响塊鐵板度郁吓郁吓有啲殘忍, 但個心諗住陣間啖啖肉, 乜都唔記得喇 !!




[youtube http://www.youtube.com/watch?v=r_fyDWZNtOU]
拆肉 !!




 !!




三兩下功夫就可以起好晒啲肉, 佩服 !!
輪到鮑魚喇, 呵呵 !!



[youtube http://www.youtube.com/watch?v=8MBJgn678m0]








好有動感, 哈哈 ~




話咁快就食得 !!




件鮑魚簡直係勁滿足呀 !! 龍蝦亦都好新鮮呀 !!




鵝肝蒸蛋, 好滑呀 !! 上面黑色嗰啲係魚子 ~




輪到銀鱈魚柳 & 煎鵝肝 ~







幾勁 …
[youtube http://www.youtube.com/watch?v=o4TxPeAxZuw]
鵝肝伴多士 ~







銀鱈魚落咗啲牛油煎, 好好味 !!




鵝肝亦係好好味吖, 但美中不足係有少少腥 !! 不過都係大滿足 !!




師傅趁空檔就預備炒飯既配料, 期間佢好抵死咁講咗句 : “個炒飯睇你都係要整鬆弛熊架啦 !!”




煙肉 & 櫻 ~




輪到澳洲和牛喇, 餐牌上和牛是薄燒的, 我哋加了 $80 (2 量) upgrade 上厚燒和牛 ~







[youtube http://www.youtube.com/watch?v=QvmmAeXac_I]
好香牛味 !! 肉質唔錯 ~




輪到炒飯時間喇, 隊長好鍾意食炒飯之餘, 亦都好鍾意睇師傅响鐵板上炒飯 !!

佢睇到入晒神呀 !!

好喇, 我哋睇吓鬆弛熊炒飯既誕生先 !!




[youtube http://www.youtube.com/watch?v=fYlcWjVvQnc]




 

大約 5 mins 左右已經砌好鬆鬆出黎喇, 幾勁 !!




好似白熊呀, 做得幾靚 !! 連二等兵都睇到入晒神呀 !!




再寫埋句生日快樂, 大功告成 !! 勁 …

一路睇住呢門藝術, 一路嘆住咁正既美食, 簡直係一大享受 !!

P.S. 我哋仲可以行埋去影相架 !!




呢個時候服務員已遞上頭先起咗肉既龍蝦殼清湯 !!




影完合照之後, 師傅就繼續炮製份炒飯 !!

[youtube http://www.youtube.com/watch?v=ZoeNyfW2Sa4]
真係炒到一粒粒吖, 味道仲好好味呀 !!




唔知咩時候又已經炒好份翠肉瓜喇 !!




呢個時候隊長突然有驚喜俾二等兵 !!

真係估唔到佢有準備呀, 多謝隊長 !!

清晒枱面所有食物後, 服務員就安排上甜品 ~

其實呢個 cake 係生日當天惠顧而送的 ~

特濃朱古力蛋糕, 有少少漏, 但就好香朱古力味 !!

鬆鬆 : “等二等兵許咗願, 吹埋爉燭後就食得, 我已經拎定隻叉喇”




雪糕有芝麻味, 綠茶味 & 朱古力味, 我哋揀咗芝麻味同綠茶味 ~




輪到師傅整豆沙餅喇 ~




話咁快就攪掂 !!




可能因為個朱古力蛋糕太甜既關係, 所以份豆餅好似無乜味, hehe ~




Total : 1293.6 (已加一)
好貴呀 … 不過如果响香港食餐稍為有質素的日式鐵板燒, 都要咁上下價錢 ~

味道唔錯之餘, 仲係一個慶祝紀念日既好地方, 同埋個炒飯真係好得意 !!

不過美中不足係上菜速度快咗啲, 同埋師傅無笑容, 仲有少少黑面 tim, 如果佢稍為親切少少就 very good 喇 !!

仲有梗係要多謝隊長送俾二等兵既禮物, 最重要係多謝隊長今晚既特別安排 !!