Keroro and Tamama : Day 1 - Part 1 (羽田機場, 增上寺, 東京鐵塔 & 六本木)

今日行程 : 羽田機場 —> 增上寺 —> 東京鐵塔 —> 六本木 —> 原宿 —> 新宿 (返酒店 Check-In) —> 新宿 Shopping —-> 涉谷 Dinner —> 返酒店

真係未出發, 先興奮呀!!!

今晚上機了, 本來諗住下午瞓個晏覺先上機, 但係今日下午要去飲, 於是就攪到成 5 點幾 6 點先返到屋企, 恰咗陣又話食飯 lu~

咁啱有張免費嘅地鐵飛, 於是我哋選擇一個最慳錢嘅方法去機場 —- 用免費飛搭地鐡去東涌, 然後轉 S1 巴士, 呢個方法只須 $3.5!!!

呵呵~~~

我哋大約 11:30pm 去到機場喇, JAL counter 本來係冇人嘅, 但唔知點解我哋行埋去之前一刻, 突然有成 10 個人彈出嚟, 攪到等咗一輪先寄到倉。

我哋兩個人一個喼去, 唔知返嚟果陣會有幾多嘢呢??

JL8730 1:50am, 25號閘口, 目的地 —- 羽田机場

攪掂哂之後, 去咗 Burger King 食宵夜 ~~~~

隊長 : “二等兵, 我哋就快上機喇 !!!”

班機勁唔 full, 我哋前面果段 Business Class 直情冇人坐, 附近都仲有好多吉位剩, 有人直情打橫瞓响 4 張 chair 喥。之但係唔知點解我哋隔離果位仁兄都唔識做嘅, 咁多吉位都喺要坐响我哋隔離做電燈膽。

之前上網聽到 d 師兄師姐話呢程凌晨機會食粥水, 於是我地連飛機餐都 book 埋, 我哋兩個都 book 咗海鮮餐。望望隔離….真係食粥水呀….呵呵呵….都係隊長好野!!!

塊蛋好厚, 好好味, 不過向來鍾意食薯仔既二等兵就唔係咁鍾意食呢 d 薯仔啦 ~

臨落機之前 30 mins, 二等兵副眼鏡臂突然斷開咗………….

唔係吓化, 雖然有 spare 眼鏡, 但係度數唔準….心情即刻跌到落最低點………..

經過 4.5 hrs 之後…………….

終於到埗喇 !!! 呢0架就係我哋頭先坐果班機喇 ~ (隊長偷影

)

好彩我哋都算坐得前, 再加上班機勁唔 full, 所以只係用咗 20 mins 就可以出到機場 & 攞埋行李喇 !!!

第一件事梗係去寄宅急便先啦 !!! 一出禁區對住有兩間, 兩間都一樣價錢 (1700 yen), 是但揀一間啦 (我哋就揀咗 JAL ABC) !!! 今日寄, 即日 4:00 pm 左右就到酒店 !!

仲問宅急便嗰哥哥仔借咗膠紙 “痴痴” 副眼鏡 tim, 攪掂 !!! 仲可以頂到 5 日 !!!

坐呢0架免費巴士去 Terminal 1嘅 8 號巴士站, 然後轉 Monorail !!!!

記住要响藍色嗰部機買 Suica 0架, 另外果部好似只係賣飛。

張 Suica 好正0架, 可以印埋自己個名0架, 仲唔係個人八達窿 ??

我地首先入咗 2000 yen, 其中 500 yen 係按金, 剩返 1500 yen, 之後到夜晚返酒店前再增值多 2000 yen, 然後在尾二果日入多 1000 yen, 就夠哂我哋用 5 日 !!!

咁鬼早, 真係得小貓三兩隻 ~

0架車嚟喇 ~ 坐 21 mins 就到浜松町站, 首站去睇東京鐵塔 ~ GO…GO…GO…

沿途風景…………… d 屋真係好得意架 !!

就快到喇 !!

到咗浜松町站之後, 找北側出口出去地面先 !!!

d locker 真係好鬼靚 ~

連消防栓都靚過人嘅 ~~~~

真係好, 比起我哋預期中嘅時間快咗 1 個鐘, 今次可以慢慢行 !!

終於嚟到我哋嘅第一站 —- 增上寺 !!

二等兵上次夏天去北海道飲唔到粟米湯, 今次天寒地凍, 見到有汽水機, 即刻要買返罐 “塞” 米湯暖下先 ~

8:10 am 就嚟到東京鐵塔喇 !!! 本來好陰天0架, 但係影影吓相, 終於出太陽, 好嘢 ~~~

東京鐵站真係好鬼靚, 我個人認為它靚過巴黎鐵塔, 或者因為巴黎鐡塔太舊喇, 又或者因為我响巴黎鐡塔下被黑人捉住隻手 ?? 唔知, 總之覺得東京鐵塔非常之靚, 尤其响夜晚 ~ 仲有個好奇怪嘅感覺, 個鐡塔成日無啦啦响我面前出現0架 ~!!!