時新快餐店@紅磡

今日weekend, 隊長打算帶隊北上食返餐, 但可惜天公不造美, 今天落雨落到傻, 但為免唔想掃隊長興, 我地就照原定計劃進行!!!

隊長話既然要搭火車北上, 佢話佢又想食紅磡既時新漢堡包!! 佢一講起食就眉飛色舞, 不過我地都成年未黎過, 於是今日放工就搭隧巴過海~

鬆弛熊未黎過, 於是帶埋鬆弛熊黎~~~

一人一個漢堡包先~

隊長叫既係芝士蛋漢堡包 + 黑椒汁 ($13)

二等兵細食 d, 要左個 “芝士蛋漢堡包加沙律醬走蛋丫唔該!!!”  ($11)

隊長話: “即係芝士漢堡包呀!!!”

區區一個漢堡包梗係唔夠隊長飽啦, 於是佢加多一個餐: 餐蛋麵 + 熱好立克 ($18)

題外話: 今日多左人响廚房做野, 上菜既速度快左好多, 以前淨係等 d 野食都可以等 30 mins, 但今日只係等左 10 mins 就食得!!

Total: $42

又題外話: 話說呢度好鬼迫, 清潔阿姐响度抺緊枱, 果張枱就迫到死行唔到過去, 佢無啦啦離遠拋條枱布, 叫坐左响度果位靚女: “塊布乾淨架, 你幫我抺下張枱丫”, 個靚女當堂嚇親: “下?!” 真係彩佢都傻, 個阿姐行到過去果陣仲話: “塊布乾淨架!!” 真係攪笑…….

講返個包, 塊漢堡扒有洋蔥味, 又係即叫即整熱辣辣, 好味過 M 記果 d。