Keroro and Tamama : 加價後既添飯小廚 ........

2010年3月17日星期三

加價後既添飯小廚 ........

話說我地已經食到無咩好食, 今日又有事要到西環, 於是我地又黎到添飯小廚侵略侵略 …..

對上一次食晚飯係 09 年年尾, 都成三個月無黎過食晚飯, 一坐低先發現個菜牌新淨左, 原來個菜牌係新印既, 再望下 d 野已經加晒價 ~

嘩, 唔係下化, 菠蘿咕嚕肉以前 $38, 而家加到 $58, 加幅達到 53% …..

而其他小菜普遍加 $10, 以 $48 加到 $58 為例, 加幅大約 $20% …..

唉, 睇黎踏入 2010 年真係無乜又平又抵既野喇 ……….

一場黎到, 我地都唔想掃興, 所以唔再深究價錢既問題, 一於叫自己想食既野 ~

好喇, 又係呢碗好 “媽媽 feel” 既中湯, 今日係青紅蘿蔔煲豬踭, 話時話個例湯真係好好飲 ~

呢個係黑板上是日推介既蒜蓉中蝦 (開邊蒸) ($78) ~

一上檯即刻聞到好香蒜蓉味 !!!

隊長同二等兵都超鍾意食蒜蓉, 加上呢個蒜蓉係炸過的就更加香口 !!!

仲有吖, 有粉絲墊底架, 粉絲又係我地兩個既至愛 !!!

唔好講咁多, 趁熱食 !!! 掂 !!!

蝦係幾新鮮 ga, 唔會梅, 又唔會死死實實, 總之就好正 !!!

呢個西蘭花炒班片 ($58), 加左 $10, 味道依舊, 班片無乜雪味 ~ 西蘭花炒得剛剛好, 唔會好淋 ~

隊長响上次已經話下次黎到一定要叫乾炒牛河 ($36), 呢 d 咁肥既野二等兵唔係成日俾佢叫, 今日達成佢心願啦 ~

呢味乾炒牛河其實先天係要用好多油黎炒, 試過响茶餐廳食過, 食到尾成碟底都係油, 但呢碟都已經算 OK 喇, 食到尾都唔會太多油, 入口又唔會好肥膩, 不過味道一般啦, 唔夠味, 好淡, 下次會叫返揚州炒飯 ~

二等兵今日俾隊長達成心願食乾炒牛河, 隊長又俾二等兵達成心願食呢個薑蔥魚雲煲 ($68), 點解要達成心願咁嚴重 ?? 皆因隊長係唔食呢 d 魚 ga, 每次二等兵話想食魚頭, 佢都 “兇” 二等兵要自己隊晒成個魚雲煲, 試問細食既二等兵又點會食得晒呢 ??? 所以次次都唔敢叫囉 !!!

今日隊長提議如果食唔晒就打包啦, 二等兵先敢叫咋 !!!