紅山泰國菜館 @ 荃灣

頭先郊遊完, 見時間尚早, 於是出荃灣食泰國野 ~

上次二等兵同屋企人試過, 個個都話好味, 隊長聽完二等兵匯報飲食軍情之後就心思思想黎侵略, 咁就擇日不如撞日啦 ~

舖裡既坐位都係大枱, 於是我地坐街邊, 而家天氣涼涼地都 OK 呀, 不過熱 d 或凍 d 就唔好喇 ~

先黎個泰式蝦刺身 ($78) ~

好新鮮, 好鮮味, 無得頂 !!

啤啤佢先 ~ 泰象啤 ($20)

冬蔭功 ($45 / 小)

話說二等兵係唔食得辣既, 最大既原因係因為每次食完辣都會喉部不適, 咁今次隊長就叫二等兵試一兩啖啦 !!!

當二等兵飲左兩啖之後, 已經樣都變晒, 真係辣到跳舞, 打開口又唔係, 合埋口又唔係, 條脷完全係痛同痺既感覺, 結果成碗野就俾隊長 KO 晒喇 !!! 真係咁大個女都未食過咁辣既野, 亦未試過咁辛苦既經驗, 經過今次呢個經驗, 二等兵就更加了解自己真係唔受得辣喇 …..

鬆鬆 : “講個秘密你知吖, 其實我唔食得辣架 !!”

泰式拼盤 ($75)

香葉包雞, 魚餅, 春卷 & 蝦餅 ~

全部都好脆口, 味道略為偏咸, 樣樣都好好味呀 ~

鬆鬆 : “雞仔, 呢度咁多選擇, 你當睇唔到 “香葉包雞” 啦 !!!”

串燒 ($48 / 半打) ~ 豬, 牛, 雞各兩串 ~

豬同牛都好靭, 但雞就好滑呀, 下次淨叫雞串 !!!

特別一提個沙嗲醬, 有花生粒, 好味 !!!

龍眼冰 ($21)

鹹魚炒芥蘭 ($42)

最後兩件送既甜品, 今晚呢件麻麻吖, 上次件椰汁糕好味 d ~

味道好正宗泰國口味, 而老闆娘既招乎就如街坊一樣, 非常親切, 所以下次會再黎侵略 ~

Total : $329 (免加一)