今日終於完成咗我哋第二個任務喇, 任務完成都已經 20:30 pm 喇, 超勁肚餓呀, 於是我哋求其响附近搵間茶餐廳醫肚 ~
嚟到呢間味皇魚蛋粉, 雖然叫 “魚蛋粉”, 但見到門口都有啲晚餐先走入去, 我哋咁肚餓, 唔食晚餐唔掂呀 !!
叫咗一個晚餐 A, 一個晚餐 C, 餐湯揀咗一紅一白 ~
呢個係是日晚餐 A - 戴安娜汁牛仔柳 + 煙肉 + 磨菇腸配意粉 ($37)
估唔到呢個戴安娜汁係黑椒, 真係開正隊長果瓣呀 !!
隊長呢個係晚餐 C - 秘製咖喱焗牛腩飯 ($40)
佢話不過不失 ~
隊長例牌飲凍奶茶 (凍飲 + $2), 二等兵揀咗柑桔蜜 ~
Total : $79
希望嚟緊既任務可以順順利利啦 !!
今日第一個特別任務終於完成喇, 成個人都好疲累, 於是獎勵下自己, 食餐好啲, 我哋同朋友甲就嚟到太古城既夢見屋喇 !!
呢個係和風煙肉雞蛋意粉 ~ ($52)
所謂既雞蛋意粉, 即係隊長至愛既 “Carbonara” 呀 ~ 餐湯係忌廉波菜湯 ~
好濃既加邦尼汁 ~
呢個係龍蝦汁蟹肉意粉 ($72) ~
好味呀 ~
朋友甲叫既忌廉三文魚日式湯飯 ($52) ~
都唔錯呀 ~
其實我哋有兩個 pasta 加 $48 轉餐 (跟餐湯, 飲品及蛋糕), 有一個 pasta 加 $25 轉餐 (跟餐湯及飲品) ~
蛋糕响門口既雪柜任揀, 我哋揀咗啲二等兵唔識整既 cake !!
啲 cake 真係好味呀 !!
真係大滿足 !!
兩杯餐飲揀咗凍有機咖啡 ~
二等兵就揀咗呢杯忌廉綠茶 (+$10) ~
Total : $337.7 (3人) ~
好滿足呀 !!
今日隊長同二等兵將會有 7 天特派任務, 任務由今日正式開始 !!
因為呢個特別任務响今日下午先開始, 所以我哋都無四圍走, 留响灣仔食 lunch ~
隊長見响灣仔, 提議上灣仔駱克道市政大廈食潮州野 ~
潮州食品, 我哋都啱呀, go go go ~
隊長帶二等兵黎到呢間叫 “怡興” ~
其實衛生都幾 dirty ga, 不過有時食野呢家野, 都係眼不見為乾淨啦 ~
鹵水鵝 ($19) ~
豬紅 ($17) ~ 另外加 $4 叫咗個白飯俾隊長 ~
双拼 - 豬大腸拼豬肚 ($19) ~
好抵呀, 埋單 $59 ~
又到芒果當造既季節, 二等兵特登整咗個芒果蛋糕俾屋企人食 ~
呢個食譜在網上找到既, 看似好多個 steps, 但其實做法一啲都唔難, 只係煩少少 ~
預早整咗呢個芒果啫喱夾心, 呢個模係之前信用咭換返嚟既批模, 嘻嘻 ~
食完晚飯嗱嗱臨開波喇, 第一步通常都係整餅底 ~
消化餅碎 + 溶牛油 ~
撈勻 ~
壓實, 不過千祈唔好壓得太實呀, 如果唔係隊長有投訴 ga …
其實本來想貪方便買急凍芒果果泥架, 但係一盒 $25, 份量只夠做一次, 所以最終都唔捨得買, 寧願攞兩個新鮮芒果自己打蓉算喇, 加埋都係 $8 ~
勁香芒果味呀 …
通常做呢啲要打忌廉芝士同淡忌廉既食譜, 懶鬼二等兵都會先打淡忌廉, 之後才打忌廉芝士, 因為打完淡忌廉後, 打蛋器唔使拎去洗就直接可以打忌廉芝士喇 … 懶鬼 ~
打至企身 ~
打忌廉芝士, 打之前最好放室溫兩小時, 或者用微波爐叮 30 秒先打 ~
打至軟滑狀 ~
依次序將芒果乳酪、芒果茸 ~
拌勻 ~
再加入打起之淡忌廉及已溶化的魚膠水 ~
拌勻 ~
可以倒入模喇, 先倒入一半忌廉芝士液, 然後將啫喱夾心放上 ~
倒入餘下的忌廉芝士液後, 可以拎去雪喇 ~
大約兩小時後, 等到忌廉芝士液凝固咗後, 就可以整鏡面 ~
因為之前跟某本烹飪書整過芒果鏡面, 於是呢 part 就照返呢本烹飪書整 ~
首先將魚膠片用凍水浸軟, 然後將芒果蓉放微波爐叮 30 秒, 之後將浸軟之魚膠片放入芒果蓉內拌勻 ~
淋上蛋糕面上 , 再放啲芒果肉, 就可以放入雪柜喇 !!
第二朝早, 起模 ~
今次側面起得好滑呀 ~
好香呀 ~
入盒, 咦 … 多咗個新成員 - 蜜峰鬆既 ~
鬆鬆個樣好薯呀, 白熊靚啲呀 ~
蜜蜂鬆你好為食呀 !!
白熊對個 cake 好似好好奇呢 ~
後面有對翼架 ~
哈哈, 睇吓啡熊對翼 ~
等咗咁耐, 終於食得喇 !!
好好味 ~
———————————————————————————————————————-
芒果乳酪芝士凍餅
6” 圓形蛋糕模 1 個
材料 :
A) 餅底 -
消化餅碎 50 g
溶牛油 25 g
B) 餡料 –
忌廉芝士 100 g
淡忌廉 (打起) 100 g
砂糖 30 g
芒果乳酪 1 杯 (150 g)
芒果茸 80 g
魚膠粉 8 g
室溫水 3 湯匙
C) 芒果啫喱夾心 –
芒果啫喱粉 30 g
魚膠粉 1 g
熱水 90 g
芒果肉適量
D) 鏡面裝飾 –
芒果茸 100 g
魚膠片 1½ 片
做法 :
A) 芒果啫喱夾心 :
芒果啫喱粉、魚膠粉放在碗內, 加熱水溶化, 待稍涼後加入芒果肉, 倒入一個 4” 模內放雪櫃內凝固。
B) 餅底 :
餅碎加牛油混合後, 放入模內壓成餅底, 放雪櫃備用。
C) 餡料
1) 忌廉芝士加糖攪拌至軟滑狀。
2) 淡忌廉打至企身。
3) 魚膠粉加室溫水, 隔熱水溶化。
4) 再依次序將芒果乳酪、芒果茸、打起之淡忌廉及已溶化的魚膠水加在忌廉芝士內拌勻。
D) 組合
1) 在餅底上倒入一半芒果忌廉芝士液, 再將已凝固了的芒果啫喱夾心放在中間, 再將餘下的芒果忌廉芝士液倒下。放入雪柜內雪至凝固。
2) 蛋糕凝固後, 將裝飾用的芒果茸淋上餅面上, 便將蛋糕放入雪柜雪至凝固。
E) 鏡面裝飾
1) 魚膠片先用凍水浸軟。
2) 芒果茸放入微波爐叮 30 秒。
3) 將已浸軟的魚膠片放入芒果茸內拌勻後, 便可淋在餅面上。
隊長一向鍾意食海南雞飯, 近排俾佢上網搵到呢間亞州家族, 於是我哋嚟試下囉 ~
隊長 order 咗 “總廚套餐 A - 海南雞飯” 後, 店員就在佢個位上放上三款醬料, 分別係 : 薑蓉, 辣醬, 同豉油 ~
雖然我哋係叫餐, 但飲品要加錢既, 呢杯係 + $8 既凍檸茶 …
二等兵既 “總廚套餐 C” 得一碗喇唦, 呢碗係 “正宗新加坡海鮮喇唦” ($68) ~
問題嚟喇, 得一碗野, 又無野飲, 又無其他小食, 點解叫做 “套餐” 呢 ??
啲料都幾足料, 但收得 $68 得一碗野, 又無野飲, 唔俾返足料點得呀 ?!
隊長呢個係總廚套餐 A, 即係招牌新加坡海南雞飯 + 油菜 + 雞湯 ($68)
網上流傳話飯是任添的, 於是二等兵幫隊長問問店員, 點知店員一句 “無呀” 就走咗去了 …
如果各位想轉雞肶, 請加 $10 ~
旁邊放了呢支廣祥泰老抽 ~
午市都要加一 ga, Total : $158
P.S. 我哋埋單俾咗 $160, 我哋坐响度邊等邊傾偈, 等咗接近 10 分鐘, 見佢未找錢就問經理啦, 佢話 “幫你跟跟”, 然後佢返去睇吓張單, 完全無意欲再找錢囉, 結果我哋等咗 15分鐘佢先找錢。
啲 “套餐” 係無野飲既, 價錢又唔平, 加一仲要想唔找尾數。
一次就夠, 無下次。