除夕晚~~ Daddyos

Happy New Year to all of you!!

大除夕去邊食飯都咁多人, 今日黎到 SOHO 區既 Daddyos。隊長早兩日已經 book 了位, 今次  book 位要先付每人 $50 之留位費, 埋單會扣返, 可能因為之前有多好人 book 左都無來吧?!

我地為免人多擠迫, 特登 book 早些, 去到都只係有兩個人坐在吧枱上傾偈, 但裡面的空間實在太少了, 好快就坐滿了人~

其實黎過好多次啦, 每次都揀選差唔多既食物~

呢個千島海鮮 pizza ($83) 反而係第一次試, 又幾好味喎~ 好鐘意佢有 8” pizza 揀, 我地兩個人食左呢個 pizza 仲可以食到其他野~

呢個係二等兵同隊長每次必叫既煙肉芝士肉汁焗薯條 $56, 因為我地兩個都係芝士怪黎架…..好味好味, 但今次我覺得燶左 d~

Caesar $48

呢個白汁煙肉火腿意粉開頭諗住係普通野, 但食落真係好好味, 唔知點形容, 總之係 “睇佢唔出”~~ $78

隊長: “請問影完味呢? 我好肚餓呀!!”

二等兵: “今日係除夕, 黎多幾張合照先啦!! kaka!”

好鐘意大時大節幫襯 Daddyos, 因為聖誔, 新年或情人節都係照正常價錢, 唔會 “趁火打劫” hehe~~

食完落返蘭桂芳開始封路啦…..我地兩個係時候撤退!!!

上海飯店@大角咀

聖誕節係咁食食食, 於是隊長同二等兵今日做返 d 消耗體力既運動………打羽毛波。

嘩連續打左兩粒鐘, 真係攰到咩咁, 做完運動又走去食, 都唔知咁辛苦做運動有冇用既…………

是日晚餐揀左附近既上海店。

先黎個酸辣湯 (客飯包埋既), 真係夠酸又夠辣….. ><

隊長猛話正正正, 二等兵食左一啖就停左…..辣到食唔到………

回鍋肉客飯一客, 但係包兩碗飯, 啱晒大食既隊長!! ($24)

二等兵叫既排骨湯麵 ($21), 冇乜味咁…….但 d “排骨” 就好鬆滑, 仲俾埋淮鹽 tim~

加多一客小籠包 $16 - 5隻, 但係皮太厚了。

飯後甜品~ 豆沙鍋餅 ($24)

Total: $85

隊長話呢間要長期侵略, 不過下次唔好食小籠包 & 鍋貼~

點解咁多人既嘉樂冰廳

早兩個月黎到嘉樂冰廳模門釘之後, 今日終於有機會黎食, 我地 2:50pm 黎到, 大排長龍……真係唔知等到幾時先有得入去坐底…… ><

等左 45-50mins, 終於入到去坐喇, 隊長叫鮮牛蛋治, 阿姐叮囑佢呢個要 “等”, 之但係隊長就係為左呢份鮮牛蛋治先大排長龍…..一場黎到, 等到冇偈啦。

我地坐低既時候, 對面兩位已經黎到食緊件豆腐, 點知我地個咖喱牛腩撈遲黎先上岸, 仲快過佢地個炸醬撈, 個男人已經有點不耐煩了。

個咖喱腩撈實在太辣喇, 於是成件豆腐等二等兵黎!!

隊長成碟咖喱腩食清晒都未見到件鮮牛蛋治…..真係要 “等” …..

之但係原來連杯凍朱古力都係要 “等……寂寞到夜深…….”

除左件蛋牛治之外, 我地已經食清晒枱面上既野喇, 杯朱古力先黎, 最不滿應該係對面個男人, 因為我地遲來, 杯朱古力都係同一時間出現。

主角終於出場……份蛋牛治一上枱就擺左去我地果邊, 點知原來對面個男人都同樣有叫蛋牛治, 真係唔好意思, 我地都唔知佢有叫, 讓俾佢先佢話唔使, 咁我地唔客氣喇!!! 不耐煩先生就顯得更加不耐煩。

份蛋牛治真係有 3” 厚………

終於, 我地排隊連埋食野用左個半鐘……..><

下次千祈唔好兩點幾去食…………

So Good Salad ^^

難得星期六唔使返工, 二等兵就用左平日返緊工既時間黎整沙律。

呢個沙律係參考 So good 入面教既方法整既~

材料

一個蘋果 + 一條甘荀 + 一個薯仔

少量洋蔥 + 少量鹽

蛋黃醬 + 煉奶

加少少鹽先~

再加埋 d 洋蔥~

撈勻後加蛋黃醬 & 煉奶~

攪掂, 食得!!

因為要去嘉樂冰廳食 lunch , 所以二等兵只係食左少少咋, 諗住夜晚返到屋企先食, 點知返到去已經俾佢地食鬼晒………

人地話無功者飯餸不留, 明明個沙律係我整架, 點解唔留俾人喎…….><

金運@ 青衣

今年既 X’mas 正日走左上梁太屋企倒亂……..

梁生梁太新居入伙, 竟然俾 “痙癴” 既二等兵整污髒左撻地……二等兵真係過意唔去……好彩大家識左 N 咁多年……知道二等兵一向痙癴開, hehe~

是日晚餐係一間睇佢唔出既酒樓, 外表比較平凡, 但係 d 野食真係睇佢唔出咁好味, ok 啦, 經濟實惠, 水準又幾好, 果然梁太介紹既都係有 d 水準~~

同場加映既麥米粥, 紅豆沙同芒果布甸~~

梁太, 下次有好野食記住預埋我呀 ^^

江戶前@荃灣

聖誕節隊長同二等兵打算到黃金海岸侵略一下~ 於是就來到荃灣吃個 lunch 先出發。

上次去到沙嗲王仲有 $12 coupon, 仲要係今日夠期 tim, 咁就食江戶前啦!

查實江戶前同沙嗲王好相似, 連 d 野食都好似…..

凍咖啡 & 荔枝特飲~

隊長叫既咖喱牛肉撈麵 ($38)

隊長超讚!!

跟餐送既泡菜, 麵豉湯 & 壽司兩件~ 唔會有太大期望~

二等兵叫既魚生飯 ($51)

多謝加一服務費~

聖誕午餐都幾满足!!

食完又有 $8 coupon 可以下次用!! ^^

隊長親自下廚.... ^^

今日二等兵唔得開同隊長開侵略會議, 於是隊長得閒到親自下廚…..

整左個薯仔紅蘿蔔蛋沙律 ^^

個賣相就幾得喇, 唔知食起上黎得唔得呢?

我俾 80分啦…果 20分扣起係因為二等兵冇得食!!