呢間餐廳係食 semi buffet 既, 但就唔似意味或薔紅咁可以唔叫 main course, 而家食 semi buffet 既餐廳越開越多, 唔知呢間餐廳又得唔得呢 ??
好喇, 坐低睇下餐牌先, semi buffet 包括 :
{餐湯 + 餐包 + 前菜 + main course + 飲品 + 甜品 + 雪糕}
我地叫左個 main course 後就可以出去攞野食喇 ~
首先梗係食冷盤啦 ~ 我地睇下有咩選擇先 ~
選擇唔算多 ~
d 翡翠螺幫你整好晒, 一 “了” 出黎就食得 !!! 非常細心 !!! 隊長食左 15 隻 ~~
凍蝦就細隻 d, 但幾新鮮, 成晚我地都食左唔少, 掂 !!!
青口就麻麻, 無乜肉, 所以食左一隻咁大把 ….
凍火腿片, 得一款揀, 但呢款味道唔錯 !!
煙鴨胸, 同街市買果 d 無分別 ~
長通粉沙律一般般, 通粉有 D 硬 ~
雜果沙律都係一般 ~
仲有 d 粟米, 菠蘿, 車厘茄同青瓜俾你自制沙律 ~~ d 食物就算無晒都 refill 得好快 ~
攞完冷盤返來見到枱面有碟三文魚刺身同八瓜魚 & 螺肉既 ?? 原來係送既 ~ 三文魚都幾新鮮, 唔錯 ~~
呢個就係餐包喇, 食得出好重橄欖油味 ~
我地又睇下隊長攞左 d 咩食先 ~
梗係佢至愛既翡翠螺 & 凍蝦啦 !!!
二等兵試下 d 沙律先 ~
呢度又好似意味同薔紅咁, 有地方自己撈凱撒沙律 ~~ 正呀, 唔同既係, 呢度既煙肉粒係新鮮煙肉, 唔似另外兩間果 d 硬掘掘食唔到, 而呢度仲有蛋碎, 多士粒 etc, 正呀, 仲有沙律醋, 真係幾健康 !!!
撈呀撈, 撈呀撈 ~~
攪掂 !!! 一碟美味既凱撒沙律將會响二等兵個肚入面啦 !!!
隊長又黎翡翠螺 + 凍蝦 ~~ 不如大家數下佢食左幾多粒翡翠螺 ???
呢個時候侍應已經遞上餐湯 ~
是日餐湯係周打蜆湯 & 南瓜忌廉湯 ~
一致認為南瓜忌廉湯好飲 d ~
二等兵對凍蝦情有獨鍾, 再黎多幾隻先 ~
隊長見二等兵讚 d 凱撒沙律, 於是佢又黎一碟, 但佢個懶鬼無撈下佢, 就咁加 pat 醬 响面就算喇 ~
hehe, 二等兵又黎多碟凱撒沙律, 因為實在太好味喇 ~~
隊長…..又黎翡翠螺 -_-“
唔知係咪侍應已經睇得出隊長驚人既食力呢 ?? 隔離枱坐得仲耐過我地都未上 main course, 但呢個時候侍應已經問我地可否上 main course 喇…..
大薯仔二等兵叫左 “法式焗田螺伴薯蓉” ($128)
d 薯蓉同埋田螺都好鬼正架啫…..真係而家打 blog 都仲回味緊 !!!
呢個係隊長叫既 “三文魚 & 煙三文白酒野菌汁扁幼意粉” ($138)
其實整體上唔差, 只不過係隊長叫錯食物, 皆因佢本身唔食魚, 而三文魚整熟左後, 唔多唔少都有點腥味, 其實二等兵食第一啖都接受唔到, 食多幾啖就接受到喇 ~ 所以話隊長叫錯食物 ~~
呢度用既杯都幾特別, 無聊中所以影下 ~~
餐後甜品有兩款 : 薑汁梳乎厘 & 心太軟, 我地再一次每樣一款 ~~
梳乎厘即叫即做, 新鮮熱辣, 有少許薑汁味, 又唔係太甜, 正 ~~~
到心太軟出場喇, 呢個甜品响二等兵心目中既甜品榜裡佔數一數二既位置 !!!
當二等兵舉起隻 spoon 諗緊從邊度劏落去果陣, 老闆突然行過黎同二等兵講, 不如俾 d 黑椒落去吖 !!! 黑椒 ?? 係呀, 佢話唔同食法架, 加少少黑椒, 連同心太軟及雪糕一齊放入口, 二等兵梗係試下佢個方法啦, 果然好特別喎 !!! 有少少辣辣地, 完全唔同食法 ~~ 真係未試過, 睇黎老闆對食都幾有研究 !!!
餐飲 : 熱檸水 + 凍檸茶 ~
呢個時候梗係睇下 d 自助甜品啦 !!!
朱古力慕士 cake, 芒果腸粉, 木糠布甸 ~~
朱古力慕士 — 正 !!!
芒果腸粉 — 好少見食 buffet 既地方有呢款甜品揀 !!! 加上味道唔錯 ~~ 正 !!!
木糠布甸 — 甜左 d, 但都 OK ~~
香蕉卷 — 正 !!! 都係好少响 buffet 裡見到有呢款甜品 !!!
泡芙 — 正 !!!
生日蛋糕 — 隊長, 生日快樂呀 !!!
各款果 tart — 塊皮實左 d ~
糯米糍 — 無食到 ~
隊長至愛 - 芒果拿破崙 — 正 !!!
生果 — 西瓜, 哈密瓜, 奇異果 — 已經食唔落 !!!
擺到成枱都係, 好開心 !!!
涼粉 — 同平時食既涼粉唔同味, 二等兵同老闆八下, 原來呢度唔係用平時既糖水, 而係用蜂蜜及蘆薈, 所以食起上黎同平時既感覺完全唔同, 老闆話咁樣會健康 d 喎, 睇黎呢間餐廳都幾注重健康 bor !! 不過老實說, 二等兵就唔係好接受到嗰款味, 但隊長覺得好味過平時果 d, 所以好唔好味就視乎各人既口味喇 ~~~
最後係每人一球既雪糕 !!! 自家制架 !!!
味道有好多款, 包括 : 芒果, 士多啤梨, 豆腐, 榴槤, 紅豆, 咖啡, 雲呢嗱 ~
本來二等兵諗緊叫紅豆定榴槤定豆腐好既, 點知老闆話香蕉雪糕啱啱新鮮整好 !!! 新鮮整 ?? 即係唔係牛奶公司果 d 貨式啦 !!! 好, 咁特別, 就要榴槤同香蕉味雪糕先 ~~
d 雪糕真係好正, 仲有榴槤肉同香蕉肉架 !!!
埋單 HK$293
雖然比起平時食開果兩間 semi buffet 貴, 但都覺得值回票價 ~~
沒有留言:
張貼留言