Keroro and Tamama : 津野日本料理放題專門店 @ 佐敦

今日係 Easter 假期前夕, 我哋玩即興嚟到佐敦津野食放題 ~

今晚真係玩即興呀, 完全無 book 位, 不過接近 7 點幾嚟到都有幾多位 ~

每人 $180, 任飲任食兩小時, 一坐低我哋就點野食喇 ~

汽水可樂, 雪碧, 芬達, 二等兵次次都會飲芬達提子汁, 每次一見到提子汁就會諗起以前哈迪斯既提子汁, hehe ~

隊長當然都要啤啤佢啦 ~

其實食物紙有好多款, 但一開頭唔知頭唔知路, 見到刺身得咁少款, 原來係有刺身 A 紙同刺身 B 紙, 之後燒物又係有幾張囉 ~ 同埋唔好睇食物紙有咁多款以為好多野食, 其實好多野都暫停供應囉 …..

我哋一遞紙, 店員話無燒牛舌, 無雞腎, 無乜乜乜, 無物物物 …. 之後陸陸續續走嚟同二等兵講呢樣無, 嗰樣無, 後來二等兵直情要問佢 : “不如你話我聽有乜野係有吖 ??”

佢俾二等兵咁問完, 態度仍然是幾好的, 但就真係好多野都無得供應囉 ….

Round 1 ~

天婦羅, 唔會好厚粉, 讚 ~

辣味螺肉, 中華沙律, 帶子裙邊, 八爪魚 ~ 普通野, 無特別 !!

主角終於到喇, 除咗暫停供應嗰啲之外, 我哋呢 round 全部都有叫, 第一轉乜都試吓吖嘛 ~

啲刺身都幾新鮮, 好鍾意啲甜蝦同醋鯖魚 ~

雞仔食雞翼, haha ~

燒蝦及燒帆立貝, 帶子未影相已經俾隊長放咗入口啦 ~

啲蝦好難剝殼, 刺身嗰啲好食啲 ~

燒羊架, 讚, 但第二 round 已經失準 ~

汁燒牛肉, 一般啦 ~

薑汁豚肉燒 ~

蒜香牛柳粒 ~

清酒煮蜆 ~

刺身沙律 ~

芝士年糕, 讚 !! 但二等兵只叫一件, 因為食兩件會好膩呀 ~

青口 ~

再叫多次中華沙律, 帶子群邊, 八爪魚, 辣味螺肉 ~

吞拿魚蓉手卷, 紫菜有 d 淋 ~

鬆鬆擒青到跳埋上去 tim …

再叫多次燒雞翼, 燒蝦同燒帆立貝~ 唉, 最衰二等兵至愛既燒牛舌同雞腎暫停供應啦 !!

啲蝦真係好難剝殼呀, 黏實晒啲肉 ~

encore 燒羊架 ~ 今次麻麻地了, 其實到 2nd round 啲野食都好麻麻地, 要不停催 ~

最慘係呢碟刺身, 二等兵追咗 45 mins 先送到, 期間已經追過店員兩三次, 佢哋既回覆係今晚唔係好夠人手, 師傅做唔切 … 但其實今晚唔係咁多人喎, 樓上都唔係坐滿, 樓下又係得一半人, 呢啲人數都做唔切, 唔知多人啲會點呢 ?! 最大問題係佢限住 2 小時, 我哋食第二轉刺身要不停追, 不停追先有得食, 嚟既時候已經等到接近尾聲喇, 唔使煮既野都要等咁耐, 無奈 ….