取帖, 買鞋及添置家居佈置 ~

响大暑既日子, 我哋响條街度行, 行, 行, 就快中暑喇 …

吃過午餐就上咗阿公屋企探阿婆, 佢仲記得我叫寶怡, 哈哈, 我相信咁耐唔見一次既人, 連我媽都未必記得個名, 反而阿婆記得我個名吖 !! 不過上到去又係咁焗呀, 唉, 斟茶嗰日都唔知點算好, 咁大夥人上到去, 又唔俾開冷氣, 又臭, 真係唔知點算 … 我諗我當日一入門, 肯定熱到個妝都溶, 仲要著住套咁厚身既裙掛, 一定會成身濕晒, 水為財呀 …

上完阿公度後, 就過海去彩印大皇取帖喇, 其實佢都好快手呀, 由上去揀款、覆稿、取件都只係兩個星期, 如果唔係覆稿嗰度我遲遲都未覆佢, 我諗佢 7 - 10 日都可以搞掂喇 !! 真係快 ~

攞咗帖又完成多一樣野喇, 夜晚俾媽媽睇, 佢哋都幾滿意呀, 不過佢哋無提出點解唔落佢阿爸個名, 佢哋唔提我梗係唔會特登講起啦 !! 只不過大家都話原來林和煦係呢個煦, 連我阿嫂都問呢個字係咩意思, 其實我只係知道有個形容詞係 “和煦的陽光”,中文唔好既我反而知道有呢個詞語囉 ..

攞完帖, 我哋就順住條路先去信和買貼紙, 買啲鬆鬆貼紙幫間屋粉飾吓先 ~~ 又上咗 Peter 仔度買咗個鬆鬆淋浴露樽, 雞仔咕0臣同埋一啲貼紙 ~ 呵呵 ~

then 再去埋有利買鞋, 不過今日唔好彩呀, 佢有一大棚親戚上咗黎, 唉, 佢掛住招呼嗰班親戚, 完全無理過我囉, 真無奈 …….. 明明大家都有俾錢, 但我就無呢個服務 ~ 最頂引係, 上次睇中咗嗰對 3” 高踭鞋, 寫住 $95, 然後我覺得太高, 佢介绍咗對 2.5” 俾我, 我見個款係一模一樣 ga, 今日俾錢先知原來嗰對係 $150, 我就問個印傭, 唔係 $95 咩 ?? 佢話一對 3”, 一對 2.5”, 我話 : “吓, 少半吋貴咁多 ?!”, 佢就答我 : “2.5” $150 係 made in Hong Kong, 而平嗰對係 made in china 囉 ~”

不過講返轉頭, 對婚紗鞋我著上腳真係幾穩陣, 平時著過吋半嗰啲我都行到碌吓碌吓咁, 但呢對個踭明顯穩陣啲 !! 同埋我揀呢個款平時都著得返, $150 都唔算貴既 ~

攪掂晒啲野後, 就坐返 102 返 home lu, 今日真係大出血呀 …