今次呢個團購可以話係中伏得最徹底既, 我哋買咗 4 份, 用咗一次(兩份) 之後, 直情係想唔再用埋其餘嗰兩份囉 !! 唔想去到再受氣呀 !! 不過到今日為止呢間食店已經關門大吉, 實在好合情理, 大家唔使去受氣 !!
團購內容 :
$38 購買全日精選套餐，包餐湯+主菜+特飲或餐飲(冷熱同價) ! 免收加一 ! 優惠券更可即場作 $10 使用，選購指定甜品 ! (原價 $168)
隊長見 $38 平平哋, 一口氣買咗 4 份。
舖內超細, 同一時間大約只可容納 20 人左右, 佢哋賣咗 3500 份出去, 唔怪得咁難 book 位啦 !!
餐湯, 一紅一白, 無特別。
飲品 : 阿華田胚牙特飲。一個字 : 淡。
朱古力特飲。 唔明點解朱古力都係特飲呢 ??
兩杯飲品好明顯用好少粉開一大杯水, 淡而無味。想慳, 都唔係慳到咁 !!
主菜 A 餐 : 西班牙香辣雞胸串燒高塔
主菜 B 餐 - 賓尼汁西冷牛扒
問題來了, 話說我們是叫 D 餐 “焗巴西豬扒飯”, 但佢聽錯咗係 B 餐, 於是我哋同佢講我哋叫既係 D, 唔係 B 啦, 以下係我哋既對答 :
老闆 : “你叫 B 吖嘛” (態度有啲不滿)
我 : “我叫 D 喎 !!”
老闆 : “我寫咗 B 喎 !!”
我 : “但我叫 D 喎 !!” (我都有啲不滿)
老闆 : “我頭先落單既時候我都有覆你一次係 B 啦 !!” (完全係推卸責任)
我 : “我頭先落單既時候我夠指住 D 俾你睇啦 !!” (事實我係指住 D 餐)
老闆 : “或者係我落錯單啦 !!” (係勁晦氣既語氣)
我 : “好明顯係你落錯單啦 !! 你唔好講到係我問題先得架 !!” (我真係超慶)
老闆 : “今日啲牛扒靚, 食牛扒好味呀 !!” (完全無換過俾我既意思)
我正想一句 : “我唔食牛架, 咁你換唔換俾我 ??”
但講之前已經俾隊長禁住 !!
雖然我兩樣都食, 就算你來錯我都無所謂可以照要, 但佢唔應該咁對客吧 ?!
又然後, 聽到佢同隔離枱既對話 :
客人 : “要一碗凍紅豆沙”
老闆 : “得熱咋, 要熱啦 !!”
客人 : “咁熱啦 !!”
老闆繼續唔停口講 : “而家天氣凍, 唔好食咁多凍嘢, 食熱咪好囉, 暖暖哋, 行出去都無咁凍, 天氣凍食咁多凍嘢對身體唔好呀 ……… 今日紅豆沙做特價, $10 你都搵唔到邊度有我咁平, 平既就自然無咁多選擇啦, 無凍呀, 食熱咪幾好………”
個客人一句都無答咀, 個老闆就不停咁講, 真係聽到我 O 晒咀。佢係咪有強迫症架 ??
食完埋單, 諗緊仲有兩張 coupon 未用, 响度愁緊幾時用埋呢兩張 coupon, 因為二等兵真係超唔想再嚟, 不如豪俾佢算喇。
事隔兩個月, 再打來 book 位, 呵呵, 打極電話都無人聽, 於是打去 Jigo 問, 佢二話不說就話可以退返錢俾我哋 !!
二等兵問佢係咪執咗, 佢哋避而不答 !!
一間餐廳就算食物有幾好, 如果要客人要受氣既話, 呢間餐廳始終逃唔過厄運。
Total : $38 x 2 = $76
P.S. http://hk.deals.yahoo.com/hong-kong/offer/history/3206
沒有留言:
張貼留言