大家係咪好奇怪呢, 點解呢篇 Neway 唱 K 既 BLOG 會放响 “侵略飲食”, 而唔係放响 “四圍侵略” 呢???
唔知點解, 好多野放响隊長眼中, 唔食得既野就聯想為一件食物, 好似有次同隊長去護膚品的舖頭, 佢望住人地一樽樽既 body cream, 佢會覺得係 ice-cream….
講返 Neway 先, 查實隊長就唔唱 K 既, 二等兵有得同隊長唱 K 都係因為果度有 d 抵食既下午茶餐吸左佢埋佢咋 !!! 
Happy Hour 由 1:00 pm 開始, $65 (已包加一) 唱 3 粒鐘, 每人包兩杯無酒精飲品, 下午茶餐由 2:30 pm 開始可以 order, 見 $65 幾抵, 又加上 K 癮起, 所以二等兵前兩天已 book 定位喇 !!!
黎到都係 1:00 pm, 佢俾左間 party 房我地, 嘩 …. 間房勁正, 兩面都有電視, 你睇……大到吖…….
開頭二等兵同隊長打對頭坐, 哇哈哈 !!!
Fruit Punch 兩杯 ~
ummm…. 大家估唔估到呢首係咩歌呢 ??? 歡迎留言估估~
二等兵已經唔理隊長, 係咁點歌俾自己唱, 而隊長百無聊賴咁, 就開始睇定下午茶叫乜~
d 下午茶餐真係勁抵, 呢個係 “意式蜆肉炒意粉”, 折實都係 $18~
唔好睇佢平, 其實都幾好味!!!
呢個係芝士焗海鮮飯 (折實價 $18), 本來我地叫芝士焗海鮮意粉既, 但係唔知係咪知道我地既飯桶隊長黎到, 以為佢叫錯, 所以整左個焗飯俾我地, 哈哈哈 …
嘩, $18 足晒料, 抵食同好食過好多茶餐廳 !!!
隊長唔抵得佢又平又抵食, 加多一份茶餐, 呢個係 “茶餐自由配搭”, 我地揀左炸咖喱角拼花生醬西多士, 你地估下幾錢 ??? 折實左都係 $15 咋 !!!
咖喱角仲要係脆架 !!!
唔係講笑, 呢個西多士勁得 !!!
埋單食連唱都係 $181, 出面炎炎夏日, 响室內玩埋食埋又有冷氣歎, 呢個都係一個唔錯既選擇 !!!
今晚 Happy Friday, 約左好耐無見既好友, 好開心, 我地一早知道大把野想傾, 所以揀左我地屋企附近, 又可以坐得耐既別府~~~
晏畫响公司, 二等兵八八掛掛咁打去問可唔可以訂位, 原來係可以架, 仲可以訂兩人 “房”, 所指既房其實係有塊可以拉動既板, 咁就好似有更大既 privacy, 呢個位都幾正, 成晚傾得好開心, 又唔會話隱閉到無侍應黎加水~
睇睇 menu, 樣樣野都想叫, 終於揀左呢幾樣~~~
檸檬橄欖油洋風沙律配鹿兒島洋蔥汁 ($38)
都幾好味, 但係好似無和民沙律咁好味~ 另外無得叫半份~ 但如果無比較之下其實係好味的!!!
鐵板牛油香草帶子 ($32) ~ 好似牛油味同蒜蓉味唔夠, 同埋又係好似和民果個好味 d ~
炸軟殼蟹 ($35), 好味, 正!!! 不過賣相有待改善, 應該將軟殼蟹放面會靚 d~
胡麻雞絲冷麵 ($45), 其實我地兩個都幾鍾意食冷麵的, 所以我地都覺得好味~
鹽燒牛舌串 (2串) ($28) - 超正, 超好味, 其實二等兵本來想 encore 的, 但係食到後尾大家都好飽喇~~
炸雞軟骨碎 ($28) - 炸得好香脆, 正~
鹽燒雞翼串 (3串) ($28) ~ 正呀 !!!
食晒野我地雞啄唔斷, 傾到口渴又叫野飲, 呢期別府做緊指定飲品買一送一 promotion, 所以我地一人一杯, 但係有樣唔好處, 就係一定要叫相同飲品, 所以如果同唔啱口味既朋友就比較難 share~
我地揀左呢杯 “非常高興” ($28), 其實即係士多啤梨 & 芒果沙冰, 個名真係非常切合今晚既心情 — 非常高興 !!!
我地 6:30 pm 入座, 坐到 11:00 pm 人地打烊先走, 服務真係一流, 佢地完全無催過我地埋單, 只係到 10:30 pm 要截數既時候同埋打烊先話 “唔好意思我地要收舖喇”, 其實係我地唔好意思至真, 因為行返出去, 原來走淨我地一枱客咋!!!
Total : $288.2
能夠同好友分享心事, 真係好開心 !!! 多謝妳~~~
為乜事會走到去長沙灣食晚飯 ?? 咪因為隊長為食囉 !!!
話說今晚隊長想同二等兵鋸扒, 但係又唔想去旺角喎, 於是隊長又發揮佢上網搵資料既本領, 無意之中找到呢間扒房, 見人地 d 相幾得, 於是就黎試下喇 !!!
呢間扒房係好傳統既扒房, 港式豉油西餐, D 員工著晒制服, 仲好好禮貌 tim~
我地坐低睇下食乜先~~~
咦, 價錢都幾大眾化 bor~
先黎個餐湯, 一紅一白~
白湯 (忌廉湯) 都係似豆粉獻, 而紅湯 (羅宋湯) 有少少辣, 二等兵接受到, 幾好味~
最驚喜既係餐包除咗多士, 仲可以揀牛角包, 真係好少地方有呢個選擇 !!!
你睇鬆弛熊都猛咁望住呢兩個牛角包 !!!
一人一個唔使爭~~~
暖暖地, 好軟熟, 正吖 !!!
二等兵叫了晚餐, 先嚟頭盤 “煙三文魚沙律”
煙三文魚真係正, 加上二等兵又鍾意食沙律, 好味 !!!
估唔到沙律係用新鮮蔬果做 (薯仔, 蘋果, 哈密瓜, 火龍果 etc.) , 唔係用罐頭生果 !!
好喇我地睇下主菜先~~~
呢個係隊長叫既特餐, “巨型肉眼扒” 配黑椒汁 ($62), 如果大食既好似隊長咁, 驚唔夠飽, 可以 +$2 跟飯或意粉 !!!
塊肉眼扒真係好巨型 !!! (二等兵一路望住呢塊巨型既肉眼扒, 一路心諗隊長會唔會食唔落個飯呢 ???)
又估唔到既係, 我地無諗過會有薯菜!!! 仲要唔係薯條, 係薯角!!!
其他配料包括粟米, 椰菜花同車厘茄~~~
嘩 …. 你睇塊扒幾厚 !!! (唔好意思有 d out focus…)
呢個就係 +$2 既飯, 飯桶隊長出場喇 !!!
二等兵點了晚餐 “紐西蘭羊扒 (配蒜蓉汁)” ($63), 可配飯, 意粉或薯菜, 大薯仔二等兵梗係跟薯菜啦 !!!
咪講笑, $63 既餐包咁多野, 竟然仲有三支羊架 !!! 响百佳買 d 靚 d 都成十幾蚊支啦 !!!
不過個汁就咸左少少….
一份咁大既餐就俾隊長鯨吞晒入個肚入面喇…… @_@”, 仲要幫二等兵包埋底 tim….究竟隊長有幾多個胃架….. ><”
二等兵已經開始食甜品, 個餐包埋既~ 可以揀 : 雪糕, 黑加崙子啫喱或芒果布甸~
大家睇下隊長好努力咁同二等兵包底 !!!
隊長就揀左芒果布甸~ 好鍾意呢 d 懷舊雪糕杯 !!!
餐飲~ 隊長呢杯係凍鴛鴦 (凍飲加 $2), 二等兵的晚餐餐飲可以揀橙汁, 雖然係細杯 d, 但呢杯橙汁幾好味 !!! (飲橙汁突然覺得自己好健康, 哈哈哈 !!!)
all KO-ed by Keroro 隊長 !!!
隊長話 : “終於找到飽既感覺, 呢個感覺遺忘左好耐喇 !!!”
Total : $129, 真係抵夾掂 !!! Must 侵略 again !!!
近排隊長成日响二等兵耳邊依依哦哦, 成日都話無蛋糕食, 於是二等兵今晚的起心肝走去買材料 !!!
黎到二得惠, 突然見到有個好平既電子磅….以前二等兵都有留意, 見到最平果 d 都要 $2xx, 二等兵驚三分鐘熱度, 所以唔捨得買, 今晚見到呢個只係 $110 咋!!! 諗左幾 mins 就決定買喇!!!
其實另外仲有一個款都係相同價錢, 不過因為個面有塊玻璃, 二等兵驚容易整爆玻璃, 所以買左呢款~
仲有個兜 tim~
另外見到果凍模 ($10), 貪得意買黎整啫喱先~~~
睇睇下又見到呢包梅子綠茶粉, 一次一包, $2.50/包, 平平地又買黎試下, 但今朝試左覺得有 d 似香精味, 味道麻麻地~
仲買左好多蛋糕材料, 不過整果陣先俾大家睇~~~
好, 整蛋糕計劃正式開始 !!!
我 pet pet 家門口~
歡迎到訪~
客廳~
睡房~
廚房~
Bathroom~
Fishing room~
Graden one~
Graden two~
Graden Three~
