一品螞蟻@葵芳

今晚二等兵飛甩隊長, 約左幾位好友慶祝 Christy 生日~~~

葵芳新都會開了 “一品螞蟻”, 裝修得好靚, 大家都未試過, 所以我地提議不如試下~

前一天, 二等兵打去 book 位, 打算 book 7:00pm, 點知服務員問我想 book 幾點, 佢話 7:00pm 後唔做 booking, 要 walk-in 攞位, 我就話正想 book 7:00pm, 她就免為其難幫我落 booking…..

我地 6:50pm 來到, 可能時間尚早, 都唔係好多人~

餐牌款式花多眼亂….我地 5 個女仔 1.5 個墟…..我地好似有選擇障礙症咁, 揀左一大輪終於揀左呢幾款食物~

挪威煙三文魚蛋白鮮蟹肉蟹籽炒飯 ($58)

我地一見到呢碟, 大家都嘩一聲, 因為同餐牌的圖實在是兩回事, 我唔但求 100% 相似, 都想有 50% 相似, 但似乎連呢 50% 都冇, 我地感覺上似揚洲炒飯加蟹籽……… -_-“

賣相有咁大差異, 諗住味道 ok 啦, 點知第一道菜就大失所望……淡而無味, 好似冇落鹽咁……….. 5 個女仔都有相同的感覺…………

瑞士香蔥金華火腿鮮蟹棒肉燴意大利麵 ($68)

蟹棒肉就得幾舊, 其他都係 d 甜豆呀, 蘿蔔絲咁, 冇料又冇味, 呢間餐廳 d 食物真健康, 連鹽都唔落多粒….. @@

香草芝士鮮菌焗西蘭花 ($40)

不過不失啦~ 呢個咁普通既食品….好難會整到唔好食架喎!!!…..如果連呢個食物都做得唔好食就真係………

但值得一提既係, 二等兵食完呢個芝士焗西蘭花都唔知原來有鮮菌, 係今天睇返個影低左既 menu, 先知原來 “有” 鮮菌既!! 究竟 d 鮮菌去晒邊呢???

香草蜜糖燒豬仔骨 ($88)

終於食到個似樣 d 既食物喇!!! 壽星女最鐘意呢個, 但 ling ling 同二等兵仍然覺得 d 肉係無味的, 一定要點汁食先有味。

挪威煙三文魚凍批蔥油薄餅 ($62)

唔錯, 幾好味!! 成晚叫左 5 樣野, 得呢個覺得真係好味, 二等兵同 Ling Ling 都好鐘意呢個~

頭先睇係咪好大塊呢? 不如我地黎個遠觀, 細件到………應該叫做一口薄餅至啱, 6件野 $62, 計埋加一成十幾蚊舊, 突然覺得自己好富貴。

落 order 時店員向我地推介這幾款飲品, 原價 $22, 現在我們可以 $10 享用, 平咁多, 我地梗係試啦~!!

幸好有叫呢幾杯飲品, 因為呢幾杯飲品為我地呢餐挽回些少分數……… (究竟我地黎食野定飲野??)

特飲有 5 款選擇, 我地揀了其中 3 款~

黑加侖子乳酪特飲~ 酸酸地, 幾醒胃~

石榴柚子乳酪特飲~ 3 款之中最好味呢款~

蘋果香桃乳酪特飲~ 這杯淡淡地~

Total : $403

結論:

1) d 食物太細碟, 5 個女仔叫 5 樣食物, 我地食完呢餐飯可以去食魚蛋。

2) 食物淡而無味, 我地唔係咸虫都覺得 d 野無厘味道, 好似無落鹽咁。

3) 趕客 - 話說食到尾聲, 5 個女仔有 2 個女仔停晒手, 店員即用 9 秒 9 的速度清場, 將她們兩位的食具, 墊枱的紙執得一乾二淨, 佢地仲要係坐 6 人卡位的最埋面, 後來得返 Ling Ling 仲食緊野既時候, 店員已經把枱面上所有野清走, 枱面得返 Ling Ling 食野果隻碟同埋佢手拎既餐具!! 之後店員問了兩次 “請問 d 野齊晒未?” 。我地來到呢間裝修得唔錯既餐廳係為左想坐耐 d 傾下計, 點知都未食完已經被人清場, 感覺同趕客無乜分別囉。埋單出去以為好多人等位, 都係得 5,6 個人姐……. >_<”, 今日又唔係 weekend, 使唔使咁趕客先??

食物唔得, 份量唔得, 又唔可以坐得耐, 淨係食裝修, So no next time !!