自家製晚餐 @ 16/10/2011

又到煮飯仔時間, 由於今日隊長要返公司 OT, 所以二等兵要自家一個人買餸呀 ………. >.<

是日例湯係清補涼煲瘦肉 ~

清補涼响藥材舖執一包, 呢度 $15。

瘦肉阿媽教買肉眼, 佢話無咁肥 bor ~  呢度半斤已經 $19 喇 ………..

落啲南北杏, 蜜棗 ~ 咁就攪掂 ~

其實煲中湯都幾易吖, 不過如果煲親湯成餐晚飯就貴啲咯 ~

二等兵問隊長 : 「隊長, 你今晚想食炆茄子定係西蘭花 ??」

隊長 : 「西蘭花。」

二等兵 : 「咁你想食蒜蓉炒西蘭花定係灼西蘭花點蠔油 ??」

隊長 : 「灼啦, 我想食蠔油 !!」

好明顯隊長醉翁之意不在酒啦 !!

响超市買西蘭花抵過响街市買, 早兩日見到百佳 $9.9 / 3 個, 今日响惠康見到 $7.9 / 2 個 ~

兩個剛剛好 ~

今晚試下整肉餅先 ~

响豬肉檔買咗 $22 梅頭瘦肉再攪碎 ~

另外再買咗一棵梅菜, 切咗少少黎用, 浸一陣洗乾淨, 再切碎 ~

梅菜同豬肉撈勻, 加啲調味料 ~

放入碟, 蒸 15 分鐘, 食得 !!!

唔知隊長對二等兵係咪無信心呢 ?? 佢竟然使出外援 !!!

佢下午返屋企見到奶奶整咗雞翼, 竟然 “撻” 咗幾隻今晚加餸 !!!

好好味呀, 嘻嘻 ~

大合照 ~

有菜有肉有湯飲, 我自己都好滿意了 ~



經過兩個星期裡間唔中既煮飯仔生活, 二等兵發現都唔係好怕煮飯, 只係怕自己一個人買餸多啲 ……………..