嘉桌餐屋 @ 灣仔

今晚唔想去咁遠, 所以近近地在灣仔開餐先 ~

隊長今晚想鋸扒, 於是我地黎到嘉桌餐屋 ~

環境唔錯吖, 暗暗地, 但就好清楚望到 d 食物 ~

坐低後, 我地研究左餐牌一輪, 終於揀到食乜喇 !!

餐湯 - 一紅一白

湯夠熱, 紅湯唔會太酸, 唔錯, 白湯真係要讚, 因為夠磨菇味, 同埋唔似豆粉獻 !!!

餐包就微熱, 有點靭喇 ~

二等兵叫既 “芝士焗意式什肉腸扁意粉” (散叫 $50, 加餐湯, 餐飽 & 餐飲 +$10)

個意粉無論味道還是材料都好得 !!!

什肉腸, 真係幾多款吖, 同埋芝士味好夠, 而茄汁味亦恰到好處, 二等兵同隊長都好鍾意食 !!!

隊長次次黎到扒房都會叫既 “美式什扒” ($88) ~

汁就可以揀 : 蒜蓉汁, 黑椒汁或燒汁, 我地今次揀左蒜蓉汁 ~

我地睇下有咩料先 ~

雞扒, 豬扒, 牛扒, 煙肉, 腸仔各一 ~

薯菜係用薯角, 唔知點解落單時唔問我地要飯, 意粉定薯菜呢 ?? 佢地無問我地要乜就俾左薯菜我地喇, 本來飯桶隊長就應該係要飯既, 但佢竟然話今晚唔想食飯, 因為又唔係炒飯底, 又無乜醬汁, 所以佢寧願食薯角 wor ~

薯菜除左薯角外, 仲有 “塞米” 一件, 甜豆, 西蘭花, 南瓜, 蕃薯 & 菇一片 ~

其實成個扒都幾好味吖, 唔係太咸, 又夠蒜蓉味 ~

餐飲 - 熱利賓納 & 凍奶茶
話說二等兵杯利賓納淡而無味, 於是問店員可唔可以加多少少利賓納, 而店員亦十分好態度, 拎一小杯濃縮未溝淡既利賓納俾二等兵 !!!

Total : $163 (已包加一服務費)

環境舒適, 食物唔錯, 價錢合理, 服務又幾好, 下次會再黎侵略 !!!