其實隊長一直都想侵略 ga 喇, 但奈何我地勁少去到觀塘呢頭, 所以今日見無乜世藝, 不如一次過侵略 IKEA 同 CoCo 壹番屋囉 !!!
睇左網友既食評, 已經知道呢間野要排長龍, 所以我地都本住食到就食, 食唔到就算數既心態, 但我地都特登提早少少黎到, 大約 18:15 pm 黎到 , 竟然無人排隊, 可以即刻入座, 今次真係估佢唔到 !!!
呢張相係食完之後補影 ga, 果陣大約 19:30 pm 啦, 其實大約 18:30 pm 後已經開始有一堆人等位喇, 到 19:30 pm 簡直多人到 …….
睇下店舖既裝修先 ~ 格局都做到幾日式餐廳, 而 d 枱擺得唔算迫, 起碼唔會俾隔離枱聽到我地傾偈先 ~
咦 ?! 有新成員既 ??
呢 set 7 週年鬆鬆就係隊長古古惑惑俾二等兵既驚喜呀 !!! 好可愛呀 !!!
雞仔好開心呀 ……
好喇 … 睇下我地叫左 d 乜先 ~
除左兩個主打咖喱飯外, 我地加了 $25 轉了 set (4 款 - 包括 : 餐湯, 沙律, 飲品及雪糕)
呢個係 - 雜菜清湯 ~
隊長話幾好味, 但二等兵就覺得一般啦 ~~
沙律可以揀芝麻醬或豉油 (沙律醋), 我地梗係一人要一款試下啦 ~~
個沙律反而幾好味, 無論係芝麻味定豉油都好好味 ~
鬆鬆掛住食雪糕都唔理碗沙律既 …….. @@
到主打咖喱飯喇 !!!!
咖喱可以分辣 (唔同等級) 同唔辣, 而飯方面, 亦可以揀不同分量的飯, 當然價錢會因應唔同既分量而有所不同啦 !!!
二等兵叫既係 “炸蝦咖喱飯” ($65)
呢個係唔辣既咖喱同 300 g (餐牌價格) 分量既飯 ~
嗜辣既隊長話呢個唔辣既咖喱好怪, 但二等兵反而因為佢係唔辣而食得好開心 !!! 雖然係唔辣, 但都幾香咖喱味呀 ~~
至於蝦呢 … 就細條左 d lor, 但就好在唔會太厚粉 ~
隊長呢個係 “牛肉奄列咖喱飯” ($65) ~ 點了辣及正常飯量 ~
白熊 : “雞仔, 你個樣好開心喎 !!!”
原來呢個奄列飯唔係蛋包飯黎 ga, 只係將層蛋舖响面, 失望 !!!
加上 d 蛋都唔算滑 lor, 失望 again …..
不過, 個咖喱汁就幾好味, 幾香咖喱味, 同埋牛肉都唔錯呀, 不過得 5 件, 真矜貴 !!
唔使一陣, 隊長就已經 KO 晒兩碟飯喇 !!!
期間我地見到隔離枱上菜都幾混亂, 隔離兩枱都上錯甜品及飲品, 另一枱就未上飲品就已經叫人埋單, 好彩我地成餐飯都無錯到 !!!
到甜品時間 ~~
鬆鬆 : “雞仔, 你支野頂到我個口喇 !!! 你今日仲乜咁開心 ??”
雪糕無得揀味道 ga, 指定左係雲呢嗱味及士多啤梨味 ~
估唔到杯雪糕咁正, 簡直係成餐飯最好味既食品 !!!
d 雪糕食得出唔係 HK 食開果 d, 好 creamy, 好牛奶, 雲呢嗱味好香牛奶味, 正 !!
士多啤梨味亦都好正, 仲有士多啤梨果肉的 ~
底部仲有幾粒雜果, $25 轉 set 有 4 樣野, 呢杯雪糕計返 $7 都唔使, 抵 !!!
飲品點了凍咖啡 & 橙汁 ~
但兩杯飲品都好難飲 ……
咖啡無咖啡味亦無奶味, 杯橙汁就好酸 … @@
Total : $198 (包加一)
結論係, 主打既咖喱飯都唔錯, 經過無乜人排隊都可以一試, 但如果要排成粒鐘先試到既話就真係咪攪喇 …..
對於我地兩個 K 隆星人黎講, 地點實在太唔就腳喇, 所以睇怕都無乜機會再黎侵略 lu ~
沒有留言:
張貼留言