Keroro and Tamama : Day 1 Part 2 - 魚心 (Lunch), Rilakkuma Store, Hotel check-in, 心齋橋

今日行程 : 羽田空港 —> 展望 DECK —> 伊丹空港 —> 梅田 —> 魚心 (Lunch) —> Rilakkuma Store —> Hotel check-in —> 心齋橋 Shopping —> Kyocera Dome Osaka —> 空中庭園 —> 元祿壽司 (Dinner) —> Hotel 休息

好喇, 擺低 d 行李响酒店後, 我地即刻出發醫下肚先 ~~

Lunch 之前途經 JR 大阪駅, 立即到みどりの窓口 (Green Window) 買嵯峨野トロッコ列車車票 !! D staff 好好人, 又 helpful, 所以非常之順利買咗 30 Mar (Day 5) 既車票 !!! 順便又買咗張 ICOCA, 方便搭車 !!!
由於住梅田關係, 我地可以行過黎阪急東通商店街, 黎到都係 12:00 noon, 所以咁多人黎大阪都寧願坐淩晨機飛東京再轉飛大阪 ~ 時間確實好見使 ~

第一餐黎到上次爸媽哥哥話好好食既 “魚心”, 呢條街好似有兩間, 我地當然揀 “本店"啦 !!

睇下食咩先 ~~

隊長 : “隨便叫, 等我黎 (俾錢) ~~”

二等兵 : “唓, 我咁細食, 好少就質飽我個肚啦 !!”

見到枱面呢張 promotion (櫻鯛, 190 yen) 好似幾吸引咁, 於是又叫黎試下 ~

點知一叫就出事 ~~ 好靭, 好多筋 (唔知係咪唔好彩食正有筋部位), 二等兵果舊都可以吞落肚, 但隊長直情咬唔開 !!! 不過為免失禮, 我地都係搵張紙巾包住佢 ~

你睇鬆鬆既反應 …………

第一件入口就咁失望, 好彩之後果 d 加返晒分 !!!

勁正既帆立貝, 好厚, 好甜 !!!

拖羅吖, 好得 !!!

豉油唔係倒落碟度, 而係俾個掃你掃上面 ~

wow, 勁正既海膽 !!! 好滿足 !!!

好滑既茶碗蒸 (燉蛋) ~

由於帆立貝實在太好味, 忍唔住要 encore ~

甜蝦勁鮮味, HK 無辦法食到 ~

一件寿司有 3 隻甜蝦 ga ~~

就係呢位師傅喇 !!! 上年睇紅葉既時候, 爸媽都話係呢位師傅整俾佢地食 !!!

食飽飽, 周圍行下先 ~

哈哈 … 見到好多鬆鬆吖 ~ 真係好想夾 ga, 但好彩都仲控制到無真係夾, 如果唔係就弊喇, 肯定得個夾字 ~

又見到好多河豚 (雞泡魚) 呢 ~ 二等兵覺得佢地好得意吖 ~ 好, 我暫時唔食你住, 到 Day 6 先食你 !!! kakakaka ……….

呢隻野好核突吖 ~ 原來係 Karaoke 店 ~

哈哈 …. 又見到好多鬆鬆吖, 真係好得意 ga ~

點知仲見到一大個紙版公仔呀 !!!!!!!!!!!!!!!!!!!!!!!!! 個紙版都算幾大 ga, 大半個人咁高, 二等兵梗係即時同佢合照啦 !!!

再四圍行下, 行到去 Hep Five, 其實呢幾日成日都會經過呢度 ~

好喇各位團友, 我地黎到今個 trip 既主題喇 !!!!! kakaka ….

登登登登 …….. 我地黎到阪急三番街既 Rilakkuma Store (鬆弛熊專門店) !!!!!

各位團友盡情咁買啦 !!!! GO GO GO ~

隊長話 : “大家隨便買啦 !!! 呢個係團友自費活動 !!!”

真係好想攬住佢 !!!

隊長 : “你當我屎架 ??”

二等兵就不停咁揀呀, 買呀, 隊長就冷眼旁觀, 於是無聊得滯就周圍影下相 ~~

不過, 其實好多野買左返 HK 都無乜用, 所以二等兵都係買左少少咋 ~

你睇佢個樣 …. hea 到咁 ….

Cup Cake 系列 ~~

法國篇系列 ~~

甜品 - 布甸

好喇 … 各位團友, 我地都係時候返酒店 check-in 喇 !! 如果而家心大心細仲諗緊買唔買鬆弛熊既話, 唔緊要, 我地 Day 7 會再侵略東京駅一番街既 Rilakkuma Store ga !!!

頭先一到埗就落雨, 而家就勁好天, 大阪 d 天氣真係好飄忽 !!!

間酒店都幾方便 ga, 响阪急三番街行過去都得 (around 10 mins) ~

房間都係一般日本酒店既大小, 不過麻雀雖少, 設備都幾齊全 ~ 有幾個位要值得讚下 tim !!!

1. 相機個原裝日本插頭係圓腳, 上次去東京都可以用圓腳插頭叉電, 所以今次只係帶左一個轉換插 for netbook 叉電, 但入到酒店房先發現所有插頭都係兩直腳, 所以一個轉換插唔夠, 問酒店有無得提供, 點知真係可以提供轉換插俾我地 ~ 用左 6 日, 到退房時先還 !!! Very good ~